Upacara adat Angon Putu salah sawijining upacara minangka wujud syukure wong Jawa marang Kang Murbeng Jagad krana wis pinaringan umur dawa lan putu akeh. Pasangan Jawa bakal nglasanakake upacara Angon Putu yen wis pinaringan putu 25 utawa 40, gumantung sing dipilih. Upacara iki klebu unik, lan narik kawigaten. Upacara angon putu biasanae dianakake ing wilayah kabudayan Jawa Mataraman, kaya ta ing eks Karesidenan Kediri. Upacara kawiwitan kanthi nglumpukake putrane, mantune, lan putune ing omahe kang nganakake upacara. Putra, putu lan mantu lungguh nglompok kanthi tertib ing papan kang wis ditemtokake. Sawise kabeh siap, wong kang kapatah minangka pranata adicara menehi ular-ular bab wigatine kulawarga tumpraping kang nganakake, lan mesisan ngenalake kulawargane amrih tansaya rumaket.
Sabanjure
pranata adicara ngundang sepasang pengangon (kang nganakake upacara). Tamtu wae
njedhule sepasang pangengon kasebut disambut kanthi bungahe ati. Kanthi kebak
kurmat, pranata adicara menehi ular-ular bab lumakune urip sepasang pengangon
kang kebak tantangan, perjuangan, kang bisa didadekake minangka patuladhan
tumprape anak putu ing samudra panguripan.
Sapurnane
acara ing omah, si pangangon kanthi dipandhu pranata adicara ngajak anak putu
padha adus ing kali. Acara adus bareng iki ngusung pesen bab wigatine banyu ing
panguripan manungsa. Saperangan awake manungsa dumadi saka banyu, lan manungsa
ora bisa urip tanpa banyu. Saliyane bisa digunakake kanggo ngresiki awak saka
maneka rereged, banyu uga dimanfaatke kanggo mbanyoni tanduran lan wit-witan
lan uga kanggo ngombe kewan. Sasuwene kegiyatan ing kali, pranata adicara
menehi ular-ular bab wigatine banyu tumprapee panguripan manungsa.
Sapungkure
upacara adus bareng ing kali, si pengangon liwat pranatacara ngajak para
peserta upacara bali menyang omah. Kanthi pambiyantu saperangan anak-putu,
sepasang pengangon banjur nyepakake piranti slametan, sawetara liyane lungguh
kanthi tertib. Sabanjure, pranata adicara menehi pengantar bab upacara kang
bakal dilaksanakake bacute, sinambi ngedum rontek (gendera kertas) marang
putu-putune.
Sabanjure,
kanthi diwiwiti sepasang pengangon minangka cucuk lampah, para putu diajak
mlaku tumuju pasar tradhisional kanggo nglesanakake upacara bacute, kanthi
ditutake dening wong tuwane dhewe-dhewe. Putra lan putrine pangangon karo bojone. Putra lan putrine pangangon karo
bojone. Adate
mainake rebana minangka musik pengiring, sinambi ngatur barisane bocah-bocah.
Eyang kakung nggawa pecut, lan sepisan-sepisan dipecutake, saengga ngetokake
swara kaya kang ditindakake dening wong angon kewan. Eyang putri nggendhong
senik kang njerone ana kanthonge isi dhuwit.
Satekane
ing pasar kang dituju, sepasang pengangon nyuwun idi marang mantri pasar kanggo
ngleksanakake upacara angon putu ing njero pasar. Kaloro sosok lansia kasebut
ndelehake cok bakal lan tumpeng. Dene para putune supaya milih maneka panganan
kang disenengi. Eyang putri mbayar kabeh jinising panganan sing dipilih putune.
Sawise kegiyatan ing pasar mungkur sepasang pengangon minangka cucuk lampah
ngajak para putune nglumpuk lan baris bali. Satekane ana ing omah lan ngaso
sawetara, pranata adicara ngajak para peserta upacara padha ngucapakake syukur
krana wis pinaringan kenikmatan dening Gusti Allah.
Panjebar Semangat No. 48, 1 Desember
2018
Tidak ada komentar:
Posting Komentar