Sunan
Prawoto utawa Raden Bagus Hadi Mukmin kuwi Raja kapapat Kesultanan Demak sing
mrentah wiwit taun 1546 nganti 1549. Sunan Prawoto minangka panerus saka Sultan
Trenggono. Piyambake kawentar luwih seneng urip dadi ulama tinimbang urip dadi
Ratu. Haul Sunan Prawoto dipengeti saben tanggal 117 Rajab. Rombongan Kirab
diwiwiti saka Bale Dhusun nganti tekan makam Sunan Prawoto, udakara 2 Km.
Arak-arakan
kirab awujud Grup Marching Band, peragaan busana karnaval, barongan nganti
ogoh-ogoh uga ana. Atusan siswa wiwit TK, SD nganti SMP padha melu baris ing
sajroning rombongan kirab. Arak-arakan kirab iki dibudhalake dening Kepala
Dinas Kepemudaan, Olahraga lan Pariwisata (Dinporapor) Kabupaten Pati, Rekso
Suhartono.
Rekso
ngajab, acara iki bisa dadi acara rutin supaya mbesuke bisa dadi daya Tarik
wisata budaya kayadene tradhisi meron ing dusun Sukolilo.
“Apamaneh
ing kene uga akeh papan wisata. Contone sendhang lan makam.” Kandhane.
Petinggi
Dusun Prawoto, Ahmad Hyro Fachrus njlenrehake yen kirab iki dirawuhi wakil saka
Kraton Surakarta, para sesepuh makam Auliya lan saka dinas paprentahan.
“Ing pangajab, kirab sing wis dadi tradhisi ing dhusun iki tetep bisa dilestarekake. Kajaba iku uga bisa nuwuhake perekonomian para warga dhusun,” pangajabe.
Wakil ketua I DPRD Pati, Joni Kurnianto sing melu
nyekseni kirab uga duwe pangajab supaya tradhisi iki tansah lestari.
”Dukungan saka DPRD ing adicara kabudayan kaya ngene iki
gedhe banget. Tradhisi lan budaya iki wigati banget. Ing pangajab, muga muga
bisa tetep Lestari,” kandhane.
Anggota D DPRD Provinsi Jawa Tengah, Kartina Sukawati
duwe panemu yen adicara budaya kaya ngene iki isa dadi “titik balik” kanggo
pariwisata Indonesia sing nembe uwal saka pandemi Covid-19. Saliyane kuwi,
anane adicara Kirab Haul bisa dadi piwulang kanggo para generasi enom nguri-uri
lan ngurmati tokoh-tokoh leluhur, mligine Sunan Prawoto.
Tidak ada komentar:
Posting Komentar