Mapan ana ing Anjungan Jawa Tengah Taman Mini Indonesia
Indah (TMII) Jakarta, dina minggu kapungkur digelar pementasan Seni Budaya
Kabupaten Pati. Ing kalodhangan kasebut kajaba dirawuhi Wakil Bupati Pati
Saiful Arifin, uga dirawuhi Plt. Kepala Badan Penghubung Propinsi Jawa Tengah,
Dewan Pembina Ikatan Keluarga Kabupaten Pati (IKKP) Mayjen TNI Agung
Rsidhianto, Anggota Komisi E DPRD Propinsi Jateng, Komisi D DPRD Propinsi Pati
lan warga Pati kang manggon ana ing Jakarta.
Pagelaran Seni Budaya Kabupaten Pati sing tampil ing
Anjungan Jawa Tengah TMII, nampilake pementasan kethoprak cilik saka SMP N 2
Kayen lan seni drama tari saka paguuyuban tari Parengga Jati Laras kanthi
judhul “Sumilak Pedhut Pati Ki Gedhe Sontho Galeng” Pimpinan Budiono.
Kesenian Kethoprak kalebu kethoprak cilik pranyata isih
kuwagang urip, buktine nalika nyekseni lan krungu swarane kenya ayu-ayu umuran
14 taunan, maragake kewasisane ana ing panggung katon ngesemake bisa menehi
panglipur marang penonton sarta ngandhut tuntunan uga budaya sing adi luhung.
Ing jrone sambutane Wakil Bupati Pati Saiful Arifin,
mratelakake pegelaran seni budaya Kabupaten Pati sing salah sijine yaiku
kethoprak cilik lan seni drama tari supaya bisa dikenal ing kancah nasional.
“Aku ngajab marang anak anak mudha lan kaum milenial bisa melu nglestarekake
kabudayan dhaerah saengga, budaya kang adiluhung iki tetep ora ilang sanajan
kena ombake kemajuan jaman sarta teknologi sing sarwa cepet iki,” pratelane.
Ing kalodhangan kasebut Saiful Arifin uga ngajab
Masyarakat Kabupaten Pati sing ana ing Jakarta aja nganti nglalekake karo
dhaerah asale. ”Ayo kita bebarengan mbangun kanthi nuduhake citra kang positif
marang donya,” pangajabe.
Kapethi Saka Panjebar
Semangat No. 24, 15 Juni 2019
Tidak ada komentar:
Posting Komentar