TRADHISI MERON

Meron yaiku tradhisi mengeti kelahiran Muhammad ing di kacamatan Sukolilo, Pati, 27 km arah kidul saka kutha Pati. Tradhisi iki ngandhut patang acara yaiku ulan-ulan, tirakatan, karnval budaya dan arak-arakan gunungan Meron. Tradhisi meron dilaksanakake saben tanggal 12 Maulud taun Caka ing penanggalan Aboge, utawa sedina sawise tanggal 12 Rabiul Awal taun Hijriah.

Mula bukane tradhisi Meron ing desa Sukolilo yaiku nalika Kadipaten Pati lan Kerajaan Mataram duwé sesambungan paseduluran kang raket. Kekarone sepakat ngrembakakake Islam lan ora gelem narima kekuasaan kang asing. Akèh pandhékar sekti saka Mataram ditekakake ing Pati kanggo nglatih kaprajuritan. Pandhékar-pandhékar iku kudu urip sawatara ing tlatah Pati. Kacarita ana Demang Sukolilo asma Ki Suta Kerta. Panjenengane gadhah sadulur asma Sura Kadam. Ki Sura Kadam gadhah pepinginan ngabdi marang Mataram, mula enggala tindak menyang Mataram. Ing sawijining wektu nalika tindak menyang Mataram, ing dalan panjenengané nemoni gegeran. Ana gajah ngamuk saéngga bisa matèni wong. Banjur Ki sura Kadam ngusadani supaya gajah iku bisa anteng. Ki Sura Kadam bisa numpaki gajah iku. Mula Ki Sura Kadam diangkat dadi punggawa kraton Mataram kang ngurusi babagan gajah. Ing sawijining dina Ki Sura Kadam kadhawuhan mimpin wadyabala mataram naklukake Kadipaten Pati. Sawisé perang, Ki Sura Kadam sowan ing Sukolilo, ing daleme Ki Suta Kerta. Nalika iku Ki Suta Kerta bingung lan wedi, wedi yèn panjenengané uga mèlu dicekel lan digawa ing Mataram. Jebul iku mau kabèh kliru, Ki Sura Kadam njlentrehake kang sabenere yèn péngin sowan kanggo nyambung tali silaturahmi. Ki Sura Kadam nyuwun palilah marang Ki Suta Kerta supaya panjenengané sarombongan bisa nginep sawatara ing Sukolilo nganti wektune bali menyang Mataram. Sura Kadam mènèhi usul, nalika Muludan (ya iku Maulud Nabi) ing Sukolilo dianakake acara kang kaya Sekatenan, gawé rame-rame lan niru-niru (tiron) acara Sekatèn. Acara iku banjur kajenengake Meron, saka tembung rame lan tiron.

Kirab arak-arakan diwiwiti dening kirab gunungan saka Yayasan Sultan Agung Sukolilo marang Mesjid Sukolilo minangka sarana njangkepi upacara selametan. Gunungan kuwi isine maneka warna panganan ing digawa dening petinggi lan perangkat desa. Saliyane kuwi, uga ana sega tumpeng sing melu di arak, sega tumpengan kuwi sing diarani Meron. Ing arak-arakan Meron, gunungan-gunungan kuwi mau duweni ciri khas, amarga gunungan iku dibagi dadi telung pérangan, ya iku:

1.      Bageyan paling dhuwur ya iku mustaka kang dhapuré lingkaran kembang manéka warna kang isinéné pitik jago utawa masjid. Pitik jago duwé teges minangka semangat keprajuritan, masjid duwé teges minangka semangat keislaman, lan kembang simbul paseduluran.

2.      Bageyan kapindho gunungan digawé saka roncean ampyang utawa krupuk manéka warna kang digawé saka tepung lan cucur. Ampyang ngemu teges minangka tameng utawa perisai prajurit lan cucur lambang tekad manunggal.

3.      Bageyan katelu ingaran ancak. Ngemu teges minangka simbole iman (ancak ndhuwur), ancak tengah simbole Islam, lan ancak ngisor simbul ikhsan.

Nalika gunungan wis tekan Mesjid Sukolilo, para warga banjur nganakake upacara slametan. Meron sing diarak cacahe ana 13 meron sing duweni pralambang cacahe perangkat desa. Prosesi Meron iku uga dibarengi manéka warna jinis kesenian tradhisional laladan iku. Sawisé upacara selametan, Sega Meron diwènèhake marang warga kang mèlu nonton.