Dening Moch. Nursyahid P
Mundure seni bathik
Indonesia ora mung amarga kalah saingan karo pangrabasane bathik cap kang
diproduksi klawan gedhen-gedhenan lan regane luwih murah, nanging uga saka
regenerasi sing mumpuni olah seni bathik durung kober kepikir. Apa maneh bareng generasi mudha samengko kari siji
loro kang ketarik sinau mbathik. Mbathik kang pawitane kudu tliti, sabar lan
tlaten kuwi dianggep mung mbuwang wektu wae, pegaweyane priyayi kuna sinambi
kalaning nganggur, kang rekasane ora sumbut karo asile. Sesebutane Sala
minangka kutha bathik, samengko kaya-kaya mung kari jeneng bae, bareng Kampung
Laweyan Sala lan sakiwa tengene kang nalika semana kondhang minangka kampung
bathik sing bisa nguripi buruh pirang-pirang lan kulawargane, saiki sepi nyenyet
kaya kuburan. Sisa-sisane jaman kencana rukmine bathik Laweyan, saiki kaya
monument mati, arupa omah gedhong magrong-magrong kang dipageri tembok dhuwur
kaya beteng kraton sing saya suwe saya kropos kepangan jaman, mujudake seksi
bisu kombak kombuling seni bathik Sala.
Solo
International Batik Exhibition (Sibex) 2004 kang digelar ing pendhapa agung
Mangkunegaran dhek tanggal 29 September nganti 3 Oktober ora mung ngadani
pameran produk industri bathik/ kain tradhisional kang paling pepak lan paling
gedhe ing Indonesia kanggo nyengkuyung Sala minangka kutha Budaya lan
Pariwisata Internasional bae, nanging uga minangka forum kanggo tukar pikiran
lan wawasan amrih bathik utawa kain tradhisional Indonesia bisa kuncara maneh
sarta dadi industri kang mandhiri.
Sibex 2004 sing kepengin ngangkat harkat, martabat lan mbangkitake seni bathik Indonesia, uga
nggelar simposium kanthi ngundang pakar-pakar kanggo njaring gagasan kepriye
amrih produk seni bathik / kain tradhisional Indonesia bisa maju. Kejaba iku
uga dianakake workshop kerajinan, demonstrasi mbathik saka pirang-pirang
generasi, fashion show, lomba busana nasional, lan lomba model cilik kang
nganggo busana kain tradhisional, minangka upaya kanggo ngrengsengake apresiasine
masyarakat marang seni bathik/ kain tradhisional.
(Panyebar Semangat, Nomer 46, tanggal 13 Nopember 2004
kaca 17).
Tidak ada komentar:
Posting Komentar