Para
warga saka Dhusun Kembang, Kecamatan Dukuhseti, Kabupaten Pati ngadhang dump
truk sing lagi momot watu tambang ing dina senen (25/3). Para warga rumangsa
keganggu amarga bledug saka aktiivitas nambal dalan nganggo beskos.
Tuntutan
para warga yaiku : 1) Nuntut supaya ruas dalan sing rusak age-age didandani lan
diaspal maneh nganggo aspal hotmix, 2) Njaluk supaya tambang-tambang sing padha
operasi nduduhake Hardcopy IUP, 3) Nuntut supaya proses penambangan dilereni
yen durung nganthongi IUP, 4) Njaluk RKAB taun 2024 marah kabeh Perusahaan
tambang sing wis operasi, 5) Njaluk supaya transportasi tambang sing nglewati
dalan Tayu-Puncel manut kelas tonnase sing wis ana.
Rasa
sabar para warga Dhusun Kembang wis rumangsa entek amarga bledug saka kendharaan truk
sing momot watu tambang wis ngluwihi aturan tonnase dalan. Aksi para warga kuwi
dilakoni kanthi cara nyegat truk sing momot watu tambang cacah welasan sing
ngliwati dalan Tayu-Puncel.
“Wis
seminggu iki bledug-e ngganggu banget. Nganti omah-omah ing sakiwa tengene
dalan Dhusun Kembang iki kudu nutup lawan lan jendhela Amarga bleduge padha
mlebu. Para warga uga akeh sing kena lara watuk lan sesek napas,” kandhane
Marji, warga Kembang sing melu aksi kuwi.
Apamaneh,
para sopir anggone nyupir truk padha ugal-ugalan sing njalari bleduge padha
mubal lan njalari jarak pandhang mung udakara 30 meter. Amarga kuwi, Marji lan
para warga liyane nuntut supaya dalan Tayu-Puncel bisa age-age didandani kanthi
cara diaspal maneh utawa hotmix.
“Saliyane
kuwi, para warga uga njaluk supaya truk-truk sing ngliwati dalan Tayu-Puncel
iki anggone momot watu ora ngluwihi wates tonnase dalen. Dalan tayu-puncel iki
kagolong kelas IIIC sing maksimal mung 8 ton. Truk-truk tambang sing liwat
muatane bisa nganti 15 ton punjul.” Ujare Marji.
Pungkasane,
petugas kepoisian saka Polsek Dukuhseti sing teka ing lokasi njaluk supaya para
warga ngrampungake aksi kuwi. Kapolsek Dukuhseti, AKP. Ali Mashuri uga njaluk
supaya para sopir muatan watu tambang sing liwat dalan Tayu-Puncel aja padha
ugal-ugalan.
“Aja nganti aksi iki malah ngganggu pengguna dalan liyane
sing liwat. Yen para warga arep ngetugake aspirasine, mangga bisa
liwat prosedur sing wis ana. Kita
uga njaluk marang para sopir supaya ora sapenake dhewe nalika ing dalan,”
penjaluke.
Para warga ngancam bakal nggelar aksi sing luwih gedhe
yen panjaluke ora digubris. Amarga anane aksi iki, dalan Tayu-Puncel sempet
macet nganti udakara sejam suwene.
Tidak ada komentar:
Posting Komentar