UNESCO,
bebadan Donya kang mayungi pawiyatan, elmu, lan kabudayan, netepake Basa
Indonesia minangka basa resmi kanggo Konferensi Umum. Putusan iku kapacak ing Resolusi 42 C/28 nalika Pleno
Konferensi Umum ka-42 UNESCO, Senen (20/11) ing markas UNESCO, Paris, Prancis.
Kementrian Luar Negeri RI ngepyakake wara-wara resmi kang
njlentrehake yen basa Indonesia dadi basa resmi ka-10 ing UNESCO. ”Basa
Indonesia kabukten dadi srana nyawijikake bangsa wiwit jaman sadurunge mardika.
Mligine liwat Sumpah Pemuda dhek 1928,” ujare Delegasi Tetap RI kanggo UNESCO,
Duta Besar Mohamad Oemar.
Kanthi putusan iki, nalika ana sidhang, pirembugan bisa
migunakake basa Indonesia. Kajaba saka iku, dokumen-dokumen Konferensi Umum uga
bisa dialihbahasake menyang basa Indonesia.
Manut
cathetane Kemenlu, sing nuturake basa Indonesia ana 275 yuta wong, sumebar ing
sakehing negara. Dene warga njaban rangkah sing melu migunakake, ana 150 ewu. Kejaba
saka iku, basa sing ndhisike sinebut cara Mlayu iku uga kadhapuk ing kurikulume
pawiyatan ing 52 negara.
Kapethik
saka Panjebar Semangat No. 48, 2 Desember 2023
Tidak ada komentar:
Posting Komentar