A. Pangertene Crita Pengalaman Pribadi
Crita pengalaman pribadhi dumadi saka 3 (telung) tembung, yaiku crita, pengalaman, lan pribadi. ‘Crita’ yaiku lelakon sing diandharake lumantar lisan utawa tulisan. ‘Pengalaman’ yaiku kedadeyan sing wis kliwat utawa wis tau dilakoni menungsa wiwit biyen nganti saiki, dene ‘pribadi’ yaiku dhiri utawa awak. Miturut pangerten ing dhuwur, crita pengalaman pribadi yaiku crita pribadi sing wis dilakoni dening pawongan.
B. Unsur
Intrinsik Crita Pengalaman Pribadi
Kaya dene unsur intrinsik crita, unsur
intrinsik crita pengalaman pribadi dibagi dadi loro (miturut wujude), yaiku
unsur lair lan unsur batin. Rong unsur mau dijalaske ing
ngisor iki.
a.
Unsur lair ana 5 (lima), yaiku 1) underan (tema):
2) paraga lan sifat paraga (tokoh lan penolohan): 3) lelakon (alur):
4) Plot: 5) pamilihing tembung (pemilihan diksi).
1) Tema yaiku titikan crita sing
sifate umum. Meh kaya judhul, nanging dudu judhul. Cara pamikiran bodhone, tema
digambarake kaya dene ‘bab’, dene judhul mono kaya dene ‘subbabe’
2) Paraga lan sifat paraga. Tuladhane,
‘Didik’ (minangka paraga). Dene ‘galak’ minangka sifate.
3)
Lelakon, yaiku lakuning crita wiwit penengalan,
penanjakan, klimaks, antiklimaks, penyelesaian.
4)
Plot wujude ana telu, yaiku 1) papan: 2) wektu: lan 3)
kahanan.
5)
Pamilihing
tembung, basa sing dipilih yaiku basa rinengga utawa basa indah.
b. Unsur batin ana 3 (telu), yaiku 1) amanat:
2) nilai: 3) makna.
C. Sipat
Pengalaman Pribadhi
Miturut isining crita, sipat sajroning pengalaman pribadi bisa arupa
sipat seneng, sedhih, sereng, jengkel, gecul (lucu), greget (semangat), lsp.. Sipat-sipat iki ora ditulis sajroning
crita. Titikan anggone nemtokake sipat-sipat crita bisa ditonton saka isi
crita. Saliyane bab kuwi, kanggo nemtokake sipat bisa uga dirasakake lumantar
trap-trapane artikulasi, ekspresi, lan intonasi.
Pengalaman ateges apa-apa kang wis nate
dialami. Pangerten wis dialami ora banjur kudu awake dhewe kang ngalami,
nanging uga bisa dening wong liya, lumantar dicritani utawa maca pengalamane
wong liya. Saben wong duwe crita pengalaman kang maneka warna. Pengalaman kuwi
ana kang ndadekake senenging ati, gawe ati lara, gawe susahe ati, gawe guyu
lsp.
Manawa crita pangalaman kuwi nyenengake, lucu lan gawe
regenging swasana, biasane kepengin dicritakake marang kanca, kaluwarga lan
sakpanunggalane. Crita kang lucu bisa gawe panglipur ati lan nambahi awet enom.
Lucu mau amarga saking bodhone, ketula-tula utawa kapinterane ndadekake geguyon
kanggone wong liya. Tuladha pengalaman lucu bisa diwaca ing rubrik Apa Tumon kalawarti minggon Panyebar Semangat utawa rubrik Ana-ana Bae ing minggon Jaya Baya. Kanggone panganggit, nulis
crita lucu bisa kanggo gladhen nulis kanthi runtut pengalamane, tumrap sing
maca bisa kanggo gladhen maca lan mangerteni isine.
Crita ing ngisor iki gatekna:
- Tekan sekolahan D krasa ana sing aneh. Sikile
krasa piye ngono yen dianggo mlaku. Bareng ndelok ngisor…ealaah jabang
bayik! Sepatu sing kudune kiwa tengen, jebule kok sing dianggo D sepatu
sing sisih kiwa kabeh. Dadi sikil kiwa lan tengen nganggo sepatu sisih
kiwa. Coba panjenengan bayangna piye gaya mlakune D. Akhire kepeksa D mara
menyang kelase mase saperlu ijol sepatu, lha wong mase ya kepeksa nganggo
sepatu sisih tengen kabeh. Masiya karo mecucu! Lha iya apa tumon, ndahneya
olehe mlaku rak pada miringe…he…he…
- Wedhuse
Kandhi kena penyakit, sikile pincang. Saking sayange karo wedhuse, lha kok
mara ing omahe pak Ketua RT, njaluk layang keluarga miskin arep kanggo
pengantar nambakake wedhuse. Dhasar sing njaluk layang wong gebleg, ketua
RT melu nggeblegi pisan: “Kowe dakgawekake layang, Ndi. Wedhusmu iku mbok
menawa kaserang penyakit polio, kudu cepet diobati. Becike gawa ing
Posyandu sesuk, ben disuntik lan diparingi vitamin. Amarga wedhusmu iku
kurang gizi”.
“Inggih
nek ngaten Pak, enjing-enjing kula bekta ting Posyandu, ing daleme Pak Modin. Mangke kersane ngiras ditimbang.”
Sesuke
wedhuse digawa neng Posyandu. Dipondhong dicedhakake pegawai Puskesmas.
“Mendha kula sakit polio Bu, kirang gizi.
Nyuwun dipuntimbang, kaliyan diparingi vitamin.”
“Nuwun sewu Pak, ngriki mung mligi mriksa
balita!” keterangane Bu Bidan karo ngguyu.
“Lho menda kula mboten saged dipun obati
ting ngriki?”
“Mboten saged, mboten dhateng ngriki
pengobatane!”
“Lha dhateng pundi Bu pengobatane?”
“Dhateng
bakul sate!” jawabe Bu Bidan karo ngempet ngguyu.
Wong-wong sing ana kono
padha ngguyu kabeh. Apa tumon?
- Ana sawenehe wedhus
wadon sing ngalang-ngalangi dalan, mula aku nyoba nyingkirake kanthi
njorogake bokonge ben nyimpang, nanging wedhus mau kaya ora seneng lan
nyoba bertahan, mula aku lan si wedhus kaya surung-surungan. Dumadakan ora
ngerti saka sangkaning bilahi ngerti-ngerti bokongku krasa disuduk saka
buri mak gabrus…nganti aku meh krungkeb. Bareng tak toleh ana wedhus
bandhot sing sikile ngarep loro pisan diangkat sajake wis siap nyruduk
maneh. Tanpa mikir dawa aku mlayu sipat kuping. Sing nggegirisi maneh
jebul bandhot kuwi mburu aku, oyak-oyakan nganti pirang-pirang menit.
Wong-wong sing ndeleng padha ngguyu kabeh. Gandheng aku wis kesel, mula
aku mandheg pasrah arep dikapakake karo si bandhot. Eh jebul bandhot kuwi
uga mandheg lan kluntrang-kluntrung ninggalke aku. Apa tumon, ana bandhot
kok cemburu amarga kekasihe diganggu wong lanang?
- Lagi ibut mangan,
dumadakan anakku ragil nylemong seru banget, “Pak, mengko balunge nggo aku
yaa!!” Dheg! Kagetku kaya disamber bledheg, ora ngira anakku arep nylemong
kaya ngono. Daksawang para tamu padha nyawang menyang mejaku karo
mesam-mesem. Aku mung bisa
tumungkul, njejak sikile anakku karo ngeses, “Sttt!!” Isinku jian ora
ketulungan. Apa tumon, kadhung kulina yen bar oleh brekat kendhuren anakku
ragil mesthi njaluk perangan sing ana balunge. Lha kok iki neng
restoran internasional mbengok, “Pak, balunge nggo aku yaa!”.
Bab kang narik kawigaten ing crita kuwi:
- Saking kesusune olehe mangkat sekolah, sepatu kang
dienggo jebul sisihan karo sepatune kangmase, iku kedadeyan kang
ngguyokake.
- Saking bodhone si Kandhi dadi gampang dibodhoni,
mosok ana wedhus ditambakake neng posyandu kang sabenere kanggo mriksa
balita. Iku kedadeyan kang ngguyokake.
- Merga oyak-oyakan karo bandhot kang nesu ngerti
kekasihe diganggu, crita iki wujud kedadeyan kang ngguyokake.
- Saking kulinane njaluk
perangan iwak pitik sing ana balunge yen mangan neng omah, jebul digawa
nalika mangan ing restoran internasional. Ndahneya gawe isine bapake.
Kedadeyan iki uga crita kang ngguyokake.
Ing dhuwur
kuwi tuladha crita pengalaman lucu. Perkara kang gawe crita kuwi lucu, kayata
saking kesusune, saking bodhone, saking kulinane lan amarga salah paham.
Tidak ada komentar:
Posting Komentar