Barat = Kidul
Crita konyol iki dialami
cah-cah sing melu jujitsu nang kampungku. Pelatihe jian kuereng pol, jenenge
Mbotho, sing SD wae ora lulus. Wonge ireng kaya Mr. T nang film “The A Team”
kae.
Sawijining sore, cah-cah
sing arep latihan nglumpuk nang lapangan buri sekolahan. Merga pelatihe durung
teka, padha ngobrol lan guyon, suarane pating cruwet. Ujug-ujug keprungu
aba-aba, “Hadap barattt, grakk!!” Cah-cah sig padha rame cep klakep, banjur padha
madhep ngulon. Tibane Mr. Mbotho malah nesu.
“Guoblokk, kon marep
ngidul kok malah marep ngulon! Barat ki ngendi?!” Mripate mencereng ketok nesu
tenan. Bocah-bocah manut, kaya kebo dikeluh, genti madhep ngidul kabeh. Sitok-sitoka ora ana sing cemuwit, apa
maneh wani protes. Kabeh methentheng serius kaya tentara lagi latihan. Kamangka
kene sing lagi padha lungguhan nang ngarep omahe Mbah S kidul lapangan padha
kepingkel-pingkel, malah ana sing kepuyuh barang.
Bareng wis bubaran, Mbah S nakoni putune sing mau melu
latihan, “Kowe iku piye, diabani hadap barat kok malah hadap selatan? Apa ra tau sinau arah mata angin? Komandan
koplo ngono kok dienut.
Dipaido ngono si K nyauri entheng, “ Timbang
ditendhang, penak melu ngoplo wae.”
Tidak ada komentar:
Posting Komentar