Tradhisi Lamporan ing Dhusun Soneyan

        Kabupaten pati salah sawijining kabupaten ing Jawa Tengah sing duweni maneka warna budaya sing unik lan bisa di unggulake. Salah sawijining budaya sing ana yaiku Tradhisi Lamporan sing ana ing Dhusun Soneyan, Margoyoso. Petinggi ing Dhusun Soneyan njlentrehake mula bukane tradhisi iki minangka budidaya warga Soneyan anggone nulak bala marang bab-bab elek sing bisa nyilakani. Ing jaman biyen, nalika wiwitan sasi Sura ing kalender Jawa, para warga padha kumpul ing tapel wates dhusun sisih wetan saprelu ngenteni taun baru.

        “Ing jaman semana, Lamporan dianakake Amarga biyen kerep banget ana prang antarane Dhusun Sidomukti kalawan Dhusun Soneyan. Prang kalawau dimenangake dening Dhusun Sidomekti. Amarga kalah, Dhusun Soneyan banjur mbacutake tradhisi kasebut. Prang lampor uga dilaksanakake dening Dhusun Tegalarum lan Dhusun Pesagen” kandhane.

        Amarga kuwi, Dhusun Soneyan kudu nglakoni tradhisi iki. Sabanjure Lamporan dipungkasi kanthi prayaan Dayakan minangka upacara panutup. Acara Dayakan diwiwiti dening Bapak Sutar Klotik sing maune tau mranto ing Kalimantan. Mula, busana sing dienggo memper kaya busanane wong Dayak. Lamporan diwiwiti awit dina Jumat Pahing nganti tekan Sebtu Pon ing sasi Sura lan dipungkasi ing dina Jumat Wage bengi. Yen ing sasi sura kuwi ora ana dina Jumat Wage, tradhisi lamporan dipungkasi ing dina kasebut sasi candhake.

        Para peserta Lamporan kuwi para warga dhusun utamane sing duweni ingon-ingon rajakaya arupa sapi/lembu. Nanging para warga sing ora duwe rajakaya uga bisa melu tradhisi iki. Para warga padha nganggo busana kaya busanane wong Dayak uga nganggo klinthingan sapi supaya tambah gayeng.

        Adicara Lamporan dilaksanakake sasuwene 7 dina kanthi acara pungkasan yaiku ngubengi dhusun supaya dhusune aman lan sejahtera. Acara mubeng dhusun biyasane dilakoni dening para priya, nganggo busana saka janur minangka pakean, uga nganggo tebeng ing sirah lan pundhake, dibacutake nggawa oncor saka blarak. Nanging ing jaman saiki oncor blarak diganti oncor saka pring sing diisi lenga lan diwenehi sumbu.