TULADHA PAWARTA TV

Pengetan Jumenengan Dalem Mangkunegara Ingkang Kaping Sanga

 Jogja TV, tanggal 8-2-2006

Pengetan jangkep kaping wolulas warsa wiyosan Jumenengan Dalem Sampeyan Ingkang Jumeneng Mangkunegara kaping sanga, dipunadani wau enjing, mapan ing Pendhapi Pura Mangkunegaran Surakarta. Salebeting adicara kasebat, katingal rawuh sawetawis para tamu inggih saking Indonesia punapa dene saking mancanagari.

Adicara pengetan wiyosan Jumenengan Dalem Sampeyan Ingkang Jumeneng Mangkunegara kaping sanga, dipunwiwiti watawis jam setengah sedasa enjing. Ing wiwitaning adicara dipunadani ujub wilujengan saha waosan donga, katindakaken dening Raden Mas Tumenggung Sajarwo Sartomo.

Sasampunipun punika, wanci jam sedasa enjing, Sampeyan Ingkang Jumeneng Mangkunegara kaping sanga sekaliyan garwa dalem saha putra dalem, kanthi kadherekaken dening para ampilan dalem, miyos saking Bale Peni tumuju dhateng Pendhapi Ageng. Salajengipun Gusti Pangeran Haryo Herwasto Kusuma munjuk ngarsa dalem, bilih lampahing pahargyan kawiwitan. Sasampunipun ingkang Jumeneng Mangkunagara lenggah ing pendhapi, lajeng kalipur mawi Beksan Bedaya Anglir Mendhung.

Salajengipun, Kangjeng Pangeran Haryo Supono kaapit dening Kangjeng Raden Tumenggung Suyanto, saha Kangjeng Raden Mas Tumenggung Anom Sugiyanto Adikusuma, munjuk Ngarsa Dalem saperlu ngaturaken kasugengan dalem, anyarengi jangkep wolulas warsa jumeneng dalem. Wanci jam sewelas siyang, sampeyan ingkang jumeneng Mangkunegara kaping sanga medhar sabda.

Adicara salajengipun inggih punika tumapaking upacara wisudhan saha waosan serat kekancingan ingkang katindhakaken dening Raden Mas Tumenggung Hudhoko Artisto. Saparipurnanipun upacara wisudhan, kalajengaken kanthi maos donga katindakaken dening Raden Mas Tumenggung Sajarwo Sartomo. Purna pamaosing donga, Gusti Pangeran Haryo Herwasto Kusuma munjuk Ngarsa Dalem, bilih pahargyan sampun paripurna. Wanci jam kalihwelas siyang, Sampeyan ingkang Jumeneng Mangkunegara kaping sanga sekaliyan garwa saha putra dalem, jengkar saking pendhapi agng, kadherekaken dening para ampilan dalem tumuju dhateng dalem Ageng saperlu nampi atur kasugengan saking para tamu.

Kanthi makaten, lampahing wilujengan dalem Mangkunegara ingkang kaping sanga sampun paripurna.