Menteri Koordinator Pembangunan Manusia lan Kebudayaan
Muhajir Effendy nuturake, pamarentah ngrancang konsep kanggo mrantasi bencana
keluwen ing telung distrik wilayah Kabupaten Puncak, Propinsi Papua Tengah.
Konsep kasebut intine nyakup penanganan jangke pendhek, manengah lan panjang.
Mligi pananganan jangka pendhek, pamarentah pusat
masthekake kabutuhan pangan sarta obat-obatan tumprap warga keluwen ing distrik
Agandugume, Lambewi lan Oneri kecukupan jrone wektu telung sasi mengarep.
Pamarentah wis kirim ewonan ton kabutuhan pokok menyang lokasi liwat Distrik
Sinak kang paling cedhak karo Agandugume.
Muhajir ngajab telung sasi maneh cuaca adhem ekstrem
Kabupaten Puncak sing ngrusak taneman pangan sirna. Saengga mbarengi enteke
cadhong kebutuhan pokok, warga wis bisa miwiti nandur jagung. Cuaca adhem
ekstrem keri-keri iki njalari tumurune salju ngebruki lahan persawahan.
”Kebutuhan pokok wis dikirim kanggo telung sasi, klebu ngirim ahli kesehatan
kanggo ngupakara ibu ngandheg lan nyusoni,” kandhane Muhajir, rebo (9/8/2023).
Yen jangka pendhek wis ora ana masalah, dibacutake
penanganan jangka menengah arupa yasa lumbung pangan ana Agandugume, klebu
mbangun akses dalan saka Sinak menyang lumbung pangan kasebut. Sasuwene iki
saka Sinak menyang Agandugume mung bisa ditempuh kanthi laku darat rong dina
sewengi suwene. ”Yen dalan iku wis dibangun, dhisitribusi barang bakal luwih
gampang awit kendharaan rodha loro bisa mlebu. Syukur-syukur rodha papat,”
tuture Muhajir.
Kapethik saka Panjebar Semangat N0. 33, 19 Agustus 2023
Tidak ada komentar:
Posting Komentar