SLAMETAN

 

Slametan tumprape masyarakat, utawa bangsa Indonesia pancen wis dadi tradhisi, apa kuwi slametan pas dina klairan utawa istilahe saiki ulang taun utawa syukuran. Pokoke akeh jinise slametan nurut kapentingane slametan kuwi mau dhewe. Luwih-luiwh kanggone masyarakat Jawa, bab slametan wis dadi sega jangan. Kaya ta wiwit bayi lair cenger wis dislameti, jenenge brokohan, puputan/ cuplak puser, dislameti jenenge sepasaran bayi. Sateruse umur pitung sasi, setaun, nganti bocah lanang wayahe sunat. Banjur jejodhohan tumprape wong wadon, menawa ngandhut entuk pitung sasi dislameti jenenge tingkeban. Bocah ngancik umur pitung wulan dislameti jenenge mitoni utawa tedhak siti. Sok yen pas dina Neptune uga dislameti, jenenge dipetri. Tumekane wis puput yuswa utawa mati, wiwit dina patine tumekane sewu dinane uga dislameti. Malah menawa pas dina geblage dislameti, jenenge pendhak.

Sejatine, tujuwane slametan kuwi duweni pamrih, golek keslametan. Muga diparingi keslametan dening Gusti Allah. Sapolahe satindake salakune muga muga tinebihna ing sambikala. Tinebihna ing memala lan tinebihna ing reribet. Menawa lagi nandhang lara, apa kena musibah apa bae merlokake slametan amrih anggone lara enggal waluya jati, seger waras kuwat slamet. Utawa menawa duweni gegayuhan apa bae, merlokake slametan amrih Gusti Allah paring kalancaran, kinabulan apa kang dikarepake. Dadi tujuwane slametan yakuwi golek slamet.

Mungguh kang dadi maknane slametan sejatine ora liya yaiku minangka atur panuwun, atur puji syukur marang Gusti Allah. Sing lara bisa oleh tamba, anggone dagang bisa lancer laris, golek rejeki gangsar, omah-omah tansah pinariingan ayem tentrem, kabeh sarwa nyenengake.

Kapethik saka Panjebar Semangat No. 24, 16 Juni 2018