Bisa Mbiyantu Tuwuh Tumangkare Utege Anak
Pangrungon mujudake tuking pangrasa
(Indera) kang paling aktif ndhisiki tumpraping manungsa, malah wiwit ing njero
kandhutan. Indera iki wiwitan dhewe dirangsang klawan ngrungokake ketege
jantung saka ibune dhewe.
Kahanan ketege jantunge ibu gedhe
dayane kanggo ngrangsang utege calon bayi. Mula saka iku, ora mung paweweh
nutrisi kang becik lan cukup, aweh pangrungu bab-bab kang bisa nentremake rasa
pangrasane ibu bisa ngrangsang uteg lan gawa daya marang tuwuh tumangakare
calon bayi. Kejaba iku, nepungake jinis-jinis swara, kayadene music wiwit ing
njero kandhutan bisa mbiyantu tuwuh tumangkare utege anak.
Dr. Anne Gracia, pawongan kang
ngecakake neurosains terapan duwe anggepan, utege anak bakal ngalami
perkembangan paling apik patang taun wiwitan ing panguripane. Mula iku,
diperlokakae rangsangan kang cukup lan trep marang sakabehing system sensorik
auditori kang gegayutan karo Indera pangrungon.
Saliyane ketege jantunge ibu, music
mujudake salah siji rangsangan kanggo nyepetake perkembangan utege bayi, mula music
bisa ndayani marang kekuwatan sinaune uteg, ningkatake ukuran pangrungon lan korteks
motoric.
“Ora mung ibu, bapak tamtune uga
nduweni lelabuhan kunci anggone ngrangsang system auditori anak, salah sijine
jalaran bapak duweni frekuwensi swara kang luwih endhek tiinimbang ibu,” Ujare
Dr. Anne. Kejaba iku, Dr. Anne nambahake, klawan music bisa mbiyantu ibu kang
lagi ngandhut nyuda rasa muneg kang dirasakake nalika ngandhut enom. Ora mung
iku wae, music uga dianggep bisa ngrangsang wiwit ibu sepisanan dhewe
dinyatakake positif ngandhut,” tegese.
Kuping iku mujudake alat Indera sing
gunane ngedap-edapi jalaran swara sing sadurunge mlebu menyang uteg kudu
ngliwati sakehing proses. Proses iku kawiwiti saka owah-owahan hawa kang
diowahi dadi geteran marang kendhangan kuping. Banjur, getaran marang mimbran
diowahi maneh dadi geteran cairan lan saka sakehing proses iki banjur
ngrangsang uteg kanggo nampa informasi. Mula saka iku, uteg duwe lelabuhan lan
wis samesthine bakal aweh tanggapan.
“Tanggapan wiwitan kasebut
mujudake awaling kapinteran tanggapan kang bisa disumurupi ora mung saka swara,
uga obahe kang ditindakake dening si anak. Malah nalika uteg ora aweh tanggapan,
bab kasebut pelu diwas-sumelangake,” tandhese Dr. Anne Gracia.
“Kalodhangan menehi sakehing tanggapan swara maranng anak ngene iki aja
dilirwakake. Jalaran yen anak wis bisa nengeri sakehing swar,
mertandhani kepinteran utege wis lumaku kanthi becik. Swara lan kepinteran
nduweni sesambungan kang kuwat banget,” ujare.
Kapethik saka Kalawarti Panjebar Semangat No. 39, 24 September 2016
Tidak ada komentar:
Posting Komentar